Info Penting Hari Ini !!!

Selamat Datang di KARYA KAMAL. Apa yang Sedang Sahabat Cari ??? Moga Blog Ini Bisa Membantu Sahabat Semua...!!! Kabar Gembira, Novel Sampan di Seberang akan segera dipublikasikan di blog ini agar para sahabat setia bisa menikmati karya yg pernah menang dalam kompetisi novel ini. Novel "Sampan di Seberang" diangkat dari kisah nyata pengalaman mengabdi di daerah terpencil. Novel "Sampan di Seberang" Tentang Pengabdian, Persahabatan & Kenangan, Tunggu Kehadirannya...!!! Karya Kamal; Novel Jalan Impian, Novel Pardangolan, Novel Sampan di Seberang, Buku Bait Bait Hati & Buku Facebook Mengguncang Dunia Akhirat. __Mustopa Kamal Batubara__ __Facebook: Mustopa Kamal Batubara.__ __Instagram: @kamal_btr.____Twitter: @mustopakamalBTR____Email: mustopakamalbatubara@gmail.com__ __Salam Karya Kamal__

Sabtu, 10 September 2016

Sikola Purba
Sebuah Film Mandailing
Tentang Kisah Santri Musthafawiyah Purbabaru
Skenario : Mustopa Kamal Batubara


Sinopsis
Film on mancaritohon kisah perjuangan ni santri na margoar si Dayat atia manuntut ilmu di Pondok Pesantren Musthafawiyah Purbabaru. Sude cobaan dohot rintangan ro tu hadopan nia. Hata sobar, i doma na mambaen ia bisa tegar manghadopi sude dangol ni hangoluan. Ia yakin, di balik ni parkancitan nangkan tarida dei saulakon hasonangan.

Tokoh
Dayat: Pemeran utama. anak yatim, bisuk, marumur 12-13 tahun.
Umak Dayat: Anakboru na marjuang sakuat tenaga pasikolaon si Dayat.
Rahman: Abang asuh ni si Dayat i Purba.
Latif: Senior ni alak si Dayat, dongan ni si Rahman.
Yahya: Dongan ni si Dayat i Purba.
Jalandit: Dongan sa SD si Dayat
Umak Jalandit: Parkombur
Umak Sangkot: Parkombur
Umak Taing: Parkombur
Guru: Pemeran pendukung
Abang Banjar: Pemeran pendukung
Ayah Jalandit: Pemeran pendukung
Nampuna Saba: Pemeran pendukung
Nampuna Toko Buku: Pemeran pendukung

Skrip
1.                 Ext. Mulak Marmayam. Potang-potang.
Jalandit: Tudia ho lalu manyambung sikola ?
Dayat: Tu Purba, ho ?
Jalandit: Tu SMP 1 Siabu. Aso na daoan ko tu sadun sikola, tahan ko mei?
Dayat: Tahan dobai, mua langa ?
Jalandit: U bege-bege na bahatan i sadun rogak, alias jihin na malua, tongkin nai ona sotop ko.
Dayat: ngadong dabo i, gabus ni alak dei kawan.
Jalandit: Nga u boto ba, ulang dokon soni, pokokna awas-awas ko.

2.            Ext. I teras ni bagas, umak-umak marburas. Kotu.
Umak Jalandit: He koum, si Dayat, anak ni si aha i, tu Purba u bege sikola tie.
Umak Sangkot: Olo, imada u bege tie.
Umak Jalandit: Sanggup do langa anakboru baya i pasikola anak nia i tu sadun, sedangkan iba sajo nga sanggup kiba, apalagi sannari na mur mamura arga ni gota.
Umak Sangkot: Imada tie, na manekat tu dei dongan u ida anakboru i, iba sajo na dong dope alaklai niba, nga barani iba pasikola anak niba tu sadun, apalagi ma ia, jando na mangomo-omo tu lupak ni alak do, tie.
Umak Jalandit: Imada, adong do na donok get kehe ntong tu na dao, adong do na gratis get kehe tu na marbayar.
Umak Taing: He angkang, na mua dei karejo muyu isi ?
Umak Sangkot: Onbo, markombur.
Umak Taing: Aha nanga dongan na masa na muba ?
Umak Jalandit: Si aha, umak ni si Dayat, na mampu ma dongan ilala ia i, angkon na tu Purba ma ipasikola ia anak nia i, i.
Umak Taing: O, nga masalah ba i, tai por roa nia mamboto agama anak nia i.
Umak Sangkot: Nga u boto dongan da, anggo on masona, pasikolaon tu purba, inda be dabe.
Umak Taing: Ma lalu ma nanga i pataru ia si Dayat tu Purba ?
Umak Jalandit: Nga u boto da, u bege-bege madung.
Umak Sangkot: Olo, ma ipataru ia ma nangkin anak nia i, get sampe nai ma rangku i, harana u ida do nangkin laos kehe, na ringgas mantong u ida ilala ia na pataru anak nia, sai dao tu sadun.

3.            Ext. Dalan Raya, Pesantren.
I bagasan motor, itatap si dayat dohot umak nia sikola Purba na godangan i. Boti tarida sonang nida roa ni alai paida-ida sikola i. Nga sadia onok, alai pe sampe di banjar. Lao alai manjalaki pondok ni si Rahman, nangkan jadi abang asuh ni si Dayat.
Umak Dayat: Denggan-denggan ko amang na sikola purba on, ma binoto ho sanga sondia hangoluanta, ho anak siangkaan, anggi-anggi mu na muloi marsikolaan sude, ayahmu madung pajolo mulak tu tuhan, iboto ho do karejo ni umak na mangomo tu lupak ni alak do karejona ari-arion. Tangi-tangi ho aha na idokon ni abang asuh mu, olo amang.
Dayat: Olo umak (get tangis ia mambege poda ni umak nia)
Umak Dayat: Rahman, jago anggi mon satolap ni gogomu ti amang, anggap ma ia songon sudaro kandungmu, pala sala ia, paingot, dungi dat-dat ajari jolo ia pala marsiajar i pondok.
Rahman: Olo etek, insyaallah aman mei etek i.
Umak Dayat: Taringot nai amang, Rahman, kira-kira adong dope i, buku ni si Dayat na urang ?
Rahman: Inda etek ibe, ma pas mei u ida.
Umak Dayat: O jadima amang, asalnama. Ning roangku soni ma jolo songoni Rahman, Dayat, mulak ma rangku jolo songoni umak tu kampung harana naron na get kehe bage dope umak tu saba mangaligi ementa i.
Dayat: Olo umak.
Rahman: Jadima etek.
Ijalang si Dayat tangan ni umak nia, songoni juo si Rahman. Tarida manetek ilu ni mata nia salaos na marsarak i dohot anakboru na paling mangholongi ia di dunia on. Idada si Dayat umak nia atia dung manaek motor. Ilu ni mata nia mur martamba maraburan. Dung kehe umak nia, alai pe kehe mulak tu pondok. Ros-ros ni ate-ate nia mur manjadi.
Rahman: Ulang ko tangis anggi be, kuatkon ma ate-atemu na get sikola Purba on, anso sada roa ni etek di huta.
Dayat: Ana ngot-ngot ulala bang na marsarak on dohot umak. Ise doma baya tongkin nai parorot anggi-anggingki i bagas pala atia kehe umak mangomo tu saba ni alak (salaos tangis).
Rahman: Nangkon anggi pikirkon tu si be, insyaallah ilehen tuhan dei dalan kaluarna (laos iapus-apus ia tanggurung ni anggi asuh nia i).
Santri Lewat: Na mua dei anggota baru on tulang, tangis ?
Rahman: Olo, baru mulak etek na ialai i, ima so sedih ilala ia.
Santri Lewat: O, ulang ko tangis anggi, ulang jabat pikirkon be sanga aha na dung lewat i, pasada ma pikiranmu, tongkin nai tagi dei ilala ho na sikola Purba on, anggo awal nai dei memang na soni, nga soni do tulang ?
Rahman: Olo songoni da, abang mu na onan pe na jolo awal nai na payahan ilala ia na manyarakkon tuak na ialai i i atia pajolo-jolo ipataru tu son.
Santri Lewat: Ingot tulang dope langa i atia pajolo-jolo jadi murid baru au.
Rahman: Diingot mantong, i dope na gosona tangisna na jolo, mangida mulak bage langsung, baenna ami patenang do dohot abang-abang banjarna on.
Santri Lewat: Haha,… lucu u lala pala u ingot atia maso i sude.
Rahman: Haha.. lucu da.

4.            Int. Di Pondok. Borngin.
Rahman: Dayat, Bornginon get kehe abang musyawarah, adong acara ni parlokal nami, i pondok on ma ho soni tie, bope na mangapil-apil ko naron, barani do ho rangku i kan ?
Dayat: (Marpikir-pikir si Dayat i bagasan ni roa nia) Sondia mantong tie, pala idokon naron nga barani iba, nga pade ilala.
Rahman: Barani do kan ?, barani doba dongani, ngana dong jabat ison sanga aha.
Dayat: Barani abang (tarsongon na tarpaksa ia mandokon na)
Rahman: Pala na so barani ho bope idokon abang naron ro tu son, dongan na i sadunan pondok na.
Dayat: Nangkon ba bang, naron manyusahkon buse non tu alai, insyaallah barani do au i.

5.            Int. Atia mangapil dung kehe si Rahman musyawarah, tarsongon na dong perasaan ni si Dayat suara na aneh.
Dayat: (I bagasan roha nia), suara ni aha do roai i tie, songon na adong u bege na aneh (Dosar taroktok nia).
Suara (Latif): Tok, tok, tok.
Dayat: Nangkin songon suara na pio-pio, on ma suara na manokok-nokok buse.
Suara (Latif): Tok, tok, tok.
Dayat: Ise dei ?
Suara: Au…
Dayat: Olo, ho mada, ise do ho, alak dia ho, get mua ho tu son ?
Suara: Au alak bariba, get pasuo dohot ko. Bukak jolo.
Dayat: Ulang ganggu au, santri baru dope au, kehe ma ho tu alammu, alam ghoib, inda di alam nyata tempat mu, pala inda kehe ho tu alammu, nangkan u baca on ma ayat kursi so terbakar ko jihin (Motar ia mandokonna).
Suara (Latif): Aso idokon ko soni Dayat, au don, bang Latif, dongan ni abangmu si Rahman.
Dayat: Ulang ko marsianyang, inda dong nangkin idokon bang Rahman jau na get ro tamu bornginon tu pondok on.
Latif: Olo, memang ngadong idokon abangmu jo, tai cuman nangkin baen na kebetulan i ami pasuo i topi dalan, ima so idokon ia iligi ho tu son, ompot mabiar ko i pondok baen na murid baru i dope ho.
Dayat: Serius do abang ?
Latif: Olo, serius.

6.            Int. Akhirna ibukak si Dayat pintu.
Latif: Kan alak do na ro on, iambang ko langa nangkin rogak, hehe…
Dayat: Olo bang, mabiar kiba dabo, na bahatan ning kalak i u bege ison jadi-jadian, apalagi borngin, naron ona ganggu buse iba.
Latif: Memang adong juo dei botulna, tai na jolo, atia dompak so rami dope murid.
Dayat: Oo
Latif: Taringot nai, na itandai mu ma abang sanga ise ?
Dayat: Inda pe bang, goarna dope na itandaan, ipe baen na idokon ni abang do nangkin.
Latif: Goar ni abang, Latif. Kampung ni abang, di Siabu, padonok-donok dohot kampung muyu i.
Dayat: Oo, abang nga dohot langa na musyawarah i ?
Latif: Inda dek, i khusus musyawarah lokal ni bangmu Rahman i sajo dei, harana marbeda do lokal nami.
Dayat: O
Latif: Abang pe dong do anggota ni abang na baru masuk sikola tu son, si Yahya goarna, ma tarpodom ia i pondok, gari nangkin na get u oban do ia tu son, so marsitandaan komu.
Dayat: Ia lokal 1 piga bang ?
Latif: lokal 1 tolu, ho lokal sada piga Yat ?
Dayat: 1 tolu juo bang.
Latif: O sa lokal do soni u ida homu i, masuk kotu kan ?
Dayat: Olo bang.
Latif: Imada, dungi, pala aha tongkin nai bope na rap masuk persatuan komu.
Dayat: Persatuan ?
Latif: Olo
Dayat: Maksud na Bang ?
Latif: Persatuan santri, maksudna, satiop daerah, adong persatuan santrina, di si ma iba ibina abang-abang kalas niba i anso bisa marpidato, mangaji dot marmasyarakat bage.
Dayat: O ido gunana i tie bang.
Latif: Olo, tongkin nai iboto ho dei sanga sondia tujuan ni i.

7.            Int. Mulak musyawarah si Rahman.
Rahman: Assalamu ’alaikum
Dayat & Latif: Wa’alaikumussalam
Latif: Bo, ma ro guru godang
Rahman: Aa, homu da, ma maruba buse u bege pamioan muyu jiba, gari pantasan do homu idokon guru godang.
Latif: Indaba, les na um cocok do tu homu dabo pamioan i, i. Warakan do homu i pado iba.
Rahman: Indaba dongan, ulang dokon songoni, alang roa.
Latif: Taringot nai, ma salose langa na musyawarah i ?
Rahman: Madung, Alhamdulillah.
Latif: O, syukur mada i.
Rahman: U ambang nga jadi ho ro nangkin tu son, na biar juo ma gari u lala maninggalkon si Dayat, mabiar au mabiar ia i pondok on sada-sada ia, baen na malam pertama i ia ison.
Latif: Imada, nangkin pe iambang ia sanga ise na ro i, waktu u tokok nangkin pintu ni pondok on.
Rahman: Imada, iba pe dabo na jolo soni juo dei kan, mabiar juo do iba sada-sada iba i pondok pajolo-jolo nai i.
Latif: Olo, botul dobai, bope sanga sadia barani ilala na les adong juo dei perasaan motar niba i.
Rahman: Olo, imada.
Latif: Taringot nai, aha doma dongan acaranta di tonga ni bornginon, inda pe ra dabo boto pit-pit ulala mata i.
Rahman: Imada, aha mantong roai tie.
Latif: Tarsongon na jalak-jalak ago-agoan ulala boto baba on.
Rahman: Aa, homu da, na mantap do u bege sannari majas muyu, taku baen na dung marsiajar pelajaran Bayan i dei.
Latif: Olo, rangku, hehe.
Rahman: Jadima, asalnama dabo.
Latif: Kembali ke laptop mulak, pandokon ni si Tukul Arwana, aha do lalu karejonta di tonga ni borngoinon ?
Rahman: Nga marimbar, ho do, pamasak bubur pe jadi, indomie pe jadi, tergantung ko do, aha do lala ho na tamana ?
Latif: Ning rohangku bope na indomie ma songoni, so ulang ma repot tu pamasakna.
Rahman: Painte ison soni so u alap indomie nai.
Latif: Ho do nanga mangalapna, nga pade ilala bo.
Rahman: Anggo nga pade ilala ho, keta dohot ko, so ita bolus golap ni ari on.
Latif: Jadi, nga marimbar, on pena na ra sajo dope on sanga tudia iontang.
Rahman: Painte ison Yat da, kehe jolo alak abang tongkin mangalap indomie tu parjagalan.
Dayat: Olo bang.

8.            Int. Parjagalan.
Rahman: Etek, adong indomie
Parjagal: Adong, Piga ?
Rahman: Tolu ma etek.
Parjagal: Na.
Rahman: Catat etek jolo isi, poken na ro ita maretong, dung ro kiriman.
Pajagal: Jadima, asalnama da tepat waktu tongkin nai
Rahman: Jadima etek, aman mei.

9.            Int. I Pondok, Marmasak Indomie.
Dayat: Ma ro alak abang ?
Rahman: Madung.
Latif: Inda dong nangkin ro makhluk tak diundang kan ?
Dayat: Inda bang, hehe.
Rahman: Adope marmasak doma karejo.
Latif: Oson so u racik nida ho, so iboto ho na tabo masakanku.
Rahman: Ah, serius ko le, pade ilala bo tamu marmasak.
Latif: Patenang ma dabo isi jugukanmu, aman mei
Rahman: Jadima anggo na songoni, oson soni bawang dohot daun sup nai so u koroti.
Latif: Na.
Rahman: Masakan ala aha do dongan na get baenon on ?
Latif: Ala koki Musthafawiyah mantong.
Rahman: Ammang.. na litakan rangku naron i.
Latif: Litak aha buse do dongan on, biaso aek dot udan do na litak, on, panganon pe litak juo, nimu da.
Rahman: maksudna dai nai do dabo, hehe..
Latif: O
Rahman: Oo, ibul…
Latif: Ma malo, nimu da
Rahman: Malo mangua ?
Latif: Malo margiri, haha

10.        Int. Indomie ma masak, get manganna doma.
Latif: Adope marsibuotma, ma masak mon.
Rahman: Serius ko le, naron ompot na pir dope songon dai ni batu.
Latif: Olo serius, dai dabo.
Rahman: Nangkonbe, langsung ma soni ipatare tu pinggan anggo na dung masak, buot ma jolo jo, so u buot buse jau, baru ibuot si Dayat buse isia.
Latif: Ah, nga pade ilala iba pajolo manjomak, homu do tuan rumah.
Rahman: Nga mua jabat i, sarupo na dei, jomaki ma songoni.
Latif: Jadima
Rahman: Masiap ibuot ko jo, au buse doma
Latif: Olo buot ma
Rahman: Na maknyusan rangku dai ni on, haras. Adope Yat, ho doma, buot jo anggi ulang ko maila-ila, buot songoni sadia na lobasmu.
Dayat: Olo bang.
Latif: Olo anggi ulang ko malang, na rap-rap ita mia ison.
Mikim si dayat pabege-bege gonjak sianyang ni abang-abang nia i.
Rahman: Tai dongan na dai mie robus do ulala dai nai
Latif: Dai mie robus doba ntong i, tai i robus.
Rahman: Hehe, sinyang na dei kawen, so ulang ma tegang tu mangan mie na milas-milas on. Maknyus…
Latif: Aha buse do dongan arti ni maknyus on?
Rahman: Tabo, lezat bin sedap alias mantap, cocok mon gari icarter jadi koki tetap i pondok on.
Latif: Haha..Nga mua ba i, asalnama tarbayar ko dengan bayaran tinggi.
Rahman: Tabo do Dayat masakan ni abang mon kan.
Dayat: Tabo bang.

11.        Int. Di pondok. Get kehe sikola. Manyogot ni ari nai.
Latif: Kehe ma ita na marpanti on Man.
Rahman: Ma ro ho langa Latif, tumben ipas, on na marsiap dope bo.
Latif:  Olo laos pataru si Yahya tu son, so marsitandaan ia dohot si Dayat, so bisa alai naron rap kehe sikola, kan si Dayat pe masuk kotu juo do ia ?
Rahman: Olo, masuk kotu da. Imada, so dong naron dongan nia kehe tu sikola, harana nga sibinoto naron tarlambat kita mulak kan, so ulang longon ilala ia laos tu lokal nia an.
Latif:  Imada
Rahman: Adope Dayat, kenalan komu jolo, nga pe na marsitandaan komu rangku kan ?
Dayat: Olo bang (Laos Marsijalangan si Dayat dot si Yahya).
Rahman: Kehe ma jolo alak abang da, ison ma homu soni, pala marmayam, ulang ma dao-dao tu.
Dayat &Yahya: Olo bang.

12.        Int. Mangecek-ecek si Dayat & Yahya.
Dayat: Anggi kandung ni bang Latif do ho kawan ?
Yahya: Inda, mua langa ?
Dayat: Ngadong ba, marsapa mia.
Yahya: Dongan sakampung dei abang i
Dayat: O
Yahya: Ho anggi kandung ni bang Rahman ?
Dayat: Au pe inda, dongan sakampung juo dei abang i.
Yahya: O
Dayat: Lokal 1 tolu juo do kalasmu kan ?
Yahya: Olo, aso iboto ho ?
Dayat: Idokon bang Latif borngini, ro abang i marmayam tu son. Ma tarpodom ko ning abang i, gari get ipadohot ia juo dei ho tu son.
Yahya: Olo tarpodom da, tarpodom kami dot bang Ridho borngini.
Dayat: Bang Ridho ise dei ?
Yahya: Anggi ni bang Latif, kalas 4
Dayat: O
Dayat: Taringot nai, ma maridi ma ho ?
Yahya: Indape, ho ?
Dayat: Au pe indape
Yahya: Keta maridi tu Singolot, na tagian isi marlange-lange, jam sada pas do ita non masuk kan
Dayat: Olo, keta, jam sada pas da.

13.       Int. Di pondok. Get kehe sikola. Kotu.
Yahya: Paipas ma Dayat so kehe ita, ma bahat ma u ida alak na markehean.
Dayat: Olo siap mon, tinggal mambuot buku doma.
Yahya: Partolot sanga pentak ulang lupa.
Dayat: Olo madung, kehe mita.
Yahya: Keta.

14.        I dalan. Manuju sikola.
Dayat: Gari dapot kita ma naron bangku jolo tie, so tagi marsiajar
Yahya: Olo, gari da. Biar niba ntong ma iteken alak pajolo.
Dayat: Pala nga dapot bangku jolo, bope bangku dua soni tie.
Yahya: Olo, nga marimbar i anggo jau, bangku balakang pe jadi do, so ulang iboto guru nai pala get kombur kiba.
Dayat: Aa, nga tola ba ntong soni i.
Yahya: Tola doba i, ise ma larangna.
Dayat: Anggo i balakang kiba nga dong dapot kiba pelajarani i.
Yahya: Dapot dei.

15.        Int. I bagas, umak si Dayat sumbayang Zuhur & mandoa.
Umak Dayat: Ya Allah, lehen ma di ami rasoki na borkah, anso bisa u pasikola daganakki di dalan na i ridhoimu. Lehen di annakku si Dayat ya Allah kekuatan dot kesabaran na manuntut ilmu agama i. Aamiin.

16.        Int. I lokal Musthafawiyah. Si Dayat di bangku jolo. Si Yahya di belakang.
Guru (Ayahanda): Assalamu ‘alaikum
Murid-murid: Wa ‘alaikummussalam wr. wb.
Guru: Lokal 1 dua do on kan ?
Murid-murid: Olo Ayah (Ayah=panggilan untuk guru)
Guru: Pake bahasa Indonesia ma songoni rangku tie, harana manurut data na i sonan, na bahatan alak luar Mandailing i lokal on, apa kabar semua ?
Murid-murid: Alhamdulillah baik Ayah
Guru: Jadi, hari ini merupakan hari pertama kita masuk sekolah, untuk itu, anak-anak didik kami sekalian, nanti harus pandai-pandai menyesuaikan diri di lokal, di banjar, maupun dengan masyarakat di lingkungan desa Purbabaru ini. Yang orang daerah ini harus menghargai kawan-kawan yang datang menuntut ilmu dari jauh, dan yang dari jauh juga nanti boleh belajar bahasa Mandailing agar bisa menyerap semua pelajaran di lokal jika nanti ayah menggunakan sebahagian istilah-istilah dalam bahasa Mandailing. Kira-kira selain itu ada lagi yang mau ditanyakan ?, adong dope roai na get isapaan ?
Yahya: Perkenalan jolo ayah
Guru: Porlu dope langa roai perkenalan, jadima anggo songoni, tangion. Semua dengarkan, nama ayah Muhammad Ihsan, biasanya dipanggil dengan sebutan ayah Ihsan, ayah asli orang Purba dan mengajar di Musthafawiyah ini sudah lebih dari 15 tahun. Salain i adong dope na get isapaan ?
Yahya: adong ayah, aha dei ayah faedah na so tahan kiba na sikola Purba on, harana i dokon alak i, nabahatan alak na so tahan sikola Purba.
Guru: Langsung tu faedah nimu da, ondope hari pertama masuk, jadima, faedahna ulang tinggalkon sumbayang 5 waktu, pabahat sobar, paotik marmayam.
Yahya: Salain i dong dope na lain ayah i
Guru: Ipe jolo abiskon, pala dung abis ko non, baru tongkin nai itambaan. Sannari giliran muyu doma sada-sada perkenalan. Silahkan berdiri satu persatu, lalu sebutkan nama, daerah asal dan banjar.

17.        Ext. gambar belajar mengajar & mulak sikola.

18.        Ext. I dalan huta salaos get tu saba. Manyogot.
Umak Jalandit: Na get tudia do ho umak Dayat i, na golap dope baya ari.
U Dayat: Get tu saba, homu langa nga tu saba sadari on angkang ?
Umak Jalandit: tu saba juo doba, naron, tai ipainte jolo torang ari on, anggo sonon golap kiba dabo kehe mabiar bage iba sanga adong bage ulok i tonga dalan.
U Dayat: Oo, Insyaallah atia I dalan non, ma torang kian ma ari i.
Umak Jalandit: Olo, bope soni dongan hati-hati boto, aso langa sai ipas tu saba ?
U Dayat: Olo angkang, so ipas dabo salose sabanta i, so bisa mangomo tu lupak ni alak, harana ma iboto angkang sanga sondia maso on, porlu epeng get uang sikola ni daganak.

19.        Ext. Dung kehe Umak si Dayat tu saba, Mamolus buse umak Sangkot ngon alaman bagas ni umak Jalandit i.
Umak Jalandit: Tudia doho umak Sangkot i ?
 Umak Sangkot: Get tu tapian, mua langa koum ?
Umak Jalandit: Nida ho do dongan umak si Dayat nangkin, golap dope ari ma kehe tu saba an.
U Sangkot: Inda boto, nga u ida ba i.
Umak Jalandit: na sonting ma dongan u ida ilala ia i, na golap dope ari ma kehe tu saba an.
Umak Sangkot: Imada tie, nga tarpainte ning roa torang ari be, nimu da.
Umak Jalandit:: Imada, na goso ma u ida ilala ia i, angke ntong pasikola daganak pe angkon na tu langit, suang na mampu, angkon na tu Purba ma nanga i, sain bahat sikola na donok-donok ison.
Umak Jalandit: Olo, imada, he saima rangku jolo, ma nasosakan u lala na get tu aek on bo, nga tartahan be.
Umak Jalandit: Olo, imada, au pe rangku na mata mekat ma rangku indan na u hodoon nangkian i dapur, kehe jolo u ligi ompot na koring ma baya.
Umak Sangkot: Lupa doma sanga nimu da, baen asyikna na mangecek i.

20.        Maripas Umak Jalandit tu dapur
Umak Jalandit: O tuhanku, ma mosok indahan bo, botul do ntong prediksi nangkian, aha doma baya ipangan anggo ma songonon, nga u boto da be (laos manggaor indan na dung get mosok i).
Ayah Jalandit: Ma masak ma lalu indahan i umakna ? (jou-jou)
Umak Jalandit: Ala le baya, ma koring, mata mekat, tarpaksa mardahan mulak ayahna.
Ayah Jalandit: Angkentong manyogot dope ari ma mangkobar-konbari sajo karejo muyu, lupa doma sanga tu indahan na baru iodohon i.

21.        Int. Mulak sikola Potang-Potang. Si Dayat mardahan di pondok.
Abang Banjar (AB): Bere pinjam jolo sabun maridi mi, atia abis dompak sabun maridi onbo.
Dayat: Painte bang so u buot.
AB: Na atia mua do ho i ?
Dayat: On do bang atia mardahan indan.
AB: Idia langa tulang i, si Rahman ?
Dayat: Inda u boto bang sanga tudia, on dope au mulak sikola, nga dong u ida nangkin ison.
AB: O.
Dayat: Na bang, sabun on.
AB: U pake jolo da.
Dayat: Olo bang.

22.        Si Dayat Termenung painteon indahan masak. Taringot ia tu umak nia. Manetek ilu ni mata nia. Flashback (tayangan inda berwarna).
Umak Dayat: Tibu ma ho amang magodang, anso saulakon jadi halak na marguna tu agama dot bangsa (Salaos iapus-apus ia ulu ni anak nia na gulung i pangkuan nia i).

23.        Int. Ro si Rahman tu pondok.
Rahman: Assalamu ‘alaikum.
Dayat: Walaikum salam.
Rahman: Na mua do ho anggi i, aso tangis ko, aha nanga na mua ?
Dayat: Inda dong bang, malungun au tu umak.
Rahman: Oo, biaso dei anggo awal nai memang soni dei malungun do iba tu kampung i, abang pe najolo songoni juo dei, sip ko anggi ulang ko tangis be, pabahat mambaca Alquran so tenang pikiran mu.
Dayat: Olo bang.

24.        Ro si Latif tu pondok ni si Rahman mangoban si Yahya.
Latif: Assalamu’alaikum
Rahman: Wa’alaikum salam, bo aha na muba tuan ?
Latif: Nga dong ba, ro tu son marmayam, baru tangis maribo-ibo anggo ta onbo pas sampe au nangkin tu pondok, ima so ioban ia jolo tuson so rami ilala ia, so ulang malungun ia.
Rahman: Na pas mei tie, anggota on pe bo, si Dayat, on dope ia tangis bo, hehe,
Latif: Sarap tangis buse alai nadua i pondok masing-masing nimu da, inda dongan na janjian kalai i.
Rahman: Nga u boto ba, sapai ma alai.
Latif: Inda dongan na janjian komu anggi i ?
Rap mikim kalai sude.

25.        Tarbege adzan Maghrib.
Rahman: Adzan dei ?
Latif: Olo, adzan da
Rahman: Kehe ma jolo ita rangku sumbayang marjamaah tu masojid.
Latif: Tu masojid do nanga ita, inda ison kita soni marjamaah ?
Rahman: Tu masojid ma soni so um khusuk.
Latif: Jadima
Rahman: Adope anggi, Dayat, Yahya, marsiap komu so keta sumbayang marjamaah tu masojid pesantren.

26.        Sumbayang. Mandoa.
Dayat: Ya Allah ya tuhanku, ampuni dosaku, dosa ni orangtuaku, lehen di au ilmu na borkah, lehen di umakku rasoki na borkah anso bisa au na sikola purba on ya Allah, holongi au di satiop waktu. Ya Allah, ya tuhanku, lehen di au kasobaran na manuntut ilmu on, anso saulakon bisa u bahagiaon keluargaku dunia akhirat. Aamiin.

27.        Ext. I dalan, mulak sumbayang Maghrib.
Rahman: Maradian kita jolo tongkin ison manabusi gule Tif, aha do gule na jita ?
Latif: Nga marimbar i, na ponting bisa do ibondut.
Rahman: Serius do da
Latif: Olo
Rahman: Aha do giot muyu anggi ?
Dayat & Yahya: Nga marimbar bang, sanga aha ma soni.
Rahman: onma soni bo sabungkus, sambal tempe on.
Latif: Parcak ma buot sabungklus nai.
Rahman: Jadima.
Rahman: Gule bulung gadung ma sabungkus nai etek.
Latif: Na epeng na
Rahman: Nangkon, onma soni syekh.
Latif: Ah pade ilala bo haras
Rahman: Nga mangua jabat i, sasakali i teraktir komu atia dong rasoki
Latif: dor pe iteraktir nga mangua, asalnama na ra ho manteraktirna.
Rahman: Jadima, asalnama pade ilala ho, hehe.
Latif: haha.
Rahman: Marsianyang dei, ulang pamasuk tu roa mu.

28.        Int. I Pondok get Mangan.
Rahman: Mangan mita
Latif: Manganma
Rahman: Adope marsibuot ma anggi indan nai, degesan dei dabo marsibuot masing-masing, harana pala sada alak non mambuot na, inda sesuai dot ukuran boltok masing-masing, nga songoni do Latif ?
Latif: Olo songoni da, naron tarsonduk kiba sa durum tu pinggan i, rupa na otik do mangan ni bayo.
Rahman: Aa,, sadurum ?, ho pe da nasantak do dongan pandokonmu.
Latif: Haha,,, sianyang na dei ulang pamasuk tu roa muyu.
Si Dayat & Yahya mikim sajo pabege-bege kecek ni abang asuh ni alai na dua i.

29.        Int. Di pondok. Subuh. Manyogot.
Rahman: Yat, Dayat, got ma ho anggi, ma subuh ma bo, adope, ngot ma ho so kehe ita tu Singolot, so sumbayang marjamaah kita i son.
Dayat: Olo Bang (laos iogos ia mata nia)
Rahman: Adope jongjong ko, so kehe ita anggi, senter i idia ibaen ko borngin i ?
Dayat: I samping ni buku i, bang.
Ibuot si Rahman senter.

30.        Ext. I dalan, tu Singolot.
Rahman: Na ngali ma dongan ari on tie, nga songon na biaso.
Dayat: Olo bang, ngali da.
Rahman: Marpalan, awas madabu, na landitan u lala dalan tu toru on, baen na udah i rangku borngin i.
Dayat: Olo bang.

31.        Ext. I Singolot manjawek.
Rahman: Adope geleranmu doma manjawek, ma siapma abang.
Dayat: Tiop abang jolo senter on.
Rahman: Oson, diama.
Dayat: On bang.

32.        Int. Sumbayang marjamaah di Pondok
Rahman: Alloohu Akbar (Imam)
Dayat: Alloohu Akbar (Makmum)
Rahman: Assalamu ‘alaikum wr wb (Salam sholat)
Dayat: Assalamu ‘alaikum wr wb.

33.        Salose sumbayang, rap mambaca Al-Quran kalai.

34.        Jam 06. 20. Ari mur ma torang.
Rahman: Kehe jolo abang mangaji tu masojid tie
Dayat: Olo Bang, danon, piga takar i dahan non bang ?
Rahman: Dua takar pe songoni, nangkon ma bahat tu, so ulang marsayang sayang songon na tuari an.
Dayat: Jadima bang

35.        Int. Mardahan si dayat. Bele-bele painte gurgur, taringot ia mulak tu umak nia, Taringot ia atia mangan i bagas. Manetek ilu nia mangingotna. Flashback (gambar inda marwarna).
Umak Dayat: Tambu ho amang, gogoi mangan so ipas magodang.
Dayat: Umak langa ma mangan ma, sotik nai doma u ida indan ?
Umak Dayat: Nangkon pikirkon anggo umak amang, anggo baen na tabo ilala ho mangan, palalu ma songoni, mardahan umak naron mulak, ulang ko jabat marsak.

36.        Int. Ma mulak si Rahman Mangaji
Rahman: Aso tangis buse ho anggi e, mua langa, taringot buse ho langa tu kampung ?
Dayat: Olo bang, taringot au mulak di umak, ise doma baya manolongi umak tu saba, pala nga i sadun au, ibo roangku baya di umak, sada-sada ia mangomo i saba an (les marabur ilu nia).
Rahman: Nangkon sai pikirkon i be anggie, insyaallah itolong tuhan dei inanta, pasada ma rohamu, anso les lalu sikola mon, paringgas ma mangapil, anso dapot ko tongkin nai juara sada, anso sonang roa ni inanta, agoon ma arsak ni rohamu, ulang pikirkon be tu balakang, pikirkonma tu jolo, sondia so deges tongkin nai masa depan mu.
Dayat: Olo bang.

37.        Int/Ext. Get kehe mangomo tu saba ni alak. Manyogot.
Nampuna saba (NS): Umak Dayat, ma sondiama, kehe ma ita  (jou-jou ngon pintu ni bagas).
Umak Dayat: Olo tuakna, keta. Mambaen inumon tu akua. Lupa buse dope nangkin, padahal ma get roma au nangkin tu sadun.
NS: O nga mangua ba jabat i, si Lian menek, dohot do ia lalu tu saba.
U Dayat: Olo ipadohot songoni, nga pade ilala ma dor tu itinggalkon dohot kalak, ipapodom ia naron i sopoan, insyaallah ra do ia modom i.
NS: O, ngana mandang payah u ida baboon saban ibe, ma ami pareso ma tu ari dohot angkangmu na i bagas, paling tolu arion siap kita mei
U Dayat: O, piga alak nanga ipio tuakna, na get marbabo on?
NS: Sada, ho mia songoni na ipio, dungi ntong au ma dohot angkangmu non tambana.
U Dayat: O u sangka songon na atia manyuan na sakalian, 3 alak ipio.
NS: Inda tarpio ilala be, ma bahat-bahat tu mangkarejoon na, harana on musim parudan, nga iboto sanga tudia i pambutan gaji ni alak na karejo i saba niba i.
U Dayat: Imada tuakna
NS: Taringot nai, si Dayat tahan ia do ntong na sikola Purba i tie.
U Dayat: Olo, Alhamdulillah tuakna
NS: Inda unjung bage ia tangis sanga mangido mulak ?
U Dayat: Manombo unjung doba tuakna, tai ntong sondia ma idokon, nga tarmulakkon dor, les isobarkon ia ma songoni, les ipaingot abang asuh nia sondia so tahan ia i sadun na sikola i.
NS: Imada tie, manombo ibo do roa paida-ida daganak on, dao ngon kiba, tai pala sikola umum buse ibaen, nga tarroaon kalai iba saulakon pala dung mate.
U Dayat: Imada tuakna na ipikirkon i, padiar ma songoni markancit kiba na pasikolaon on, asalnama baya tongkin nai lopes anak niba i kawajiban nia, bisa ia manyumbayangkon kiba pala dung kehe.
NS: Imada baya, na jopan roangku dabo paida-ida anak mi baya, na ringgasan u ida i,  sikola SD pe rangku sakali dapot juara sajo do ia i tie.
U Dayat: Alhamdulillah dapot juara sajo da tuakna,
NS: Pala atia mulak ia tongkin nai, dokon jolo ro ia tu bagas, so u tabusi tongkin nai isia abit sumbayang.
U Dayat: Jadima tuakna.

38.        Int. Di pondok. Mulak sikola si Rahman.
Rahman: Aha dei karejo mi Dayat ?
Dayat: Mangapil bang. Ma mulak langa alak abang ?
Rahman: Madung
Dayat: Aso na ipasan bang ?
Rahman: Musyawarah guru, get bahsul masail.
Dayat: O
Rahman: Get kehe abang non tu Pasar baru, dohot do ho ?
Dayat: Get mua dei bang ? Nga cukup rangku balanjongku bang pokenon ibe, pala dohot au tu pasar.
Rahman: Get manabusi buku, ulang ko mabiar, abang non mangongkosi ho, so ulang marsak pikiranmu, ketama songoni non, tarsajom mia non i, insyaallah tarkojar dei non masuk kotu.
Dayat: Jadima bang.

39.        Ext. I Pasar Baru Panyabungan.
Rahman: Gonon ma ita Yat, dalan tu toko buku pasar baru i.
Dayat: Olo bang.
Rahman: Adong udak buku Bajuri.
Nampuna Toko Buku (TB): Adong, jilid piga ?
Rahman: Jilid 2 udak.
Nampuna TB: On amang, pareso ma sanga cocok.

Rahman: Keta marlao-lao jolo Yat, maligi-ligi panganon jolo, ompot dong na tabo.
Dayat: Olo bang.
Rahman: Ima soni rangku itabusi, sangbal gadung i, sekalian bisa dongan ni gule mangan.
Dayat: Olo bang.
Rahman: Jagal bakso ibo Yat, por do roamu bakso ?
Dayat: Inda saru bang.
Rahman: Mangan bakso ma jolo ita songoni rangku, iteraktir abang ko.

40.        Ext. Umak si Dayat i les mangomo dope i lupak ni alak. Tonga ari.
NS: Maradian ma jolo ita umak Dayat, ma kotu ari, mangan ma jolo ita, naron doma ipalalu i
U Dayat: Olo tuakna, ro nai mon, pajolo ma so u palalu jolo na sotik nai on.
NS: O jadima, pajolo ma au songoni tie, so u pasiap kinan parjugukan ta, ulang ma lambat tu be tie, so rap mangan kita.
U Dayat: Jadima etekna.

NS: Adope pajuguk komu umak Dayat, so mangan kita jolo, baru naron doma ipalalu i dung sumbayang kotu.
U dayat: Olo etekna.

41.        Ext. Sopo saba
NS: Adope marsisondukma songoni.
U Dayat: Adope palalu ma tuakna, so baru u sonduk buse.
NS: Taringot nai, bisuk do ntong si Lian menek tie, ra do ia modom onok I anggunan i, inda partangis ia u ida tie.
U Dayat: olo tuakna, Alhamdulillah.
NS: tarsongon na iboto nia ning roan atia karejo umak nia nimu da.
U Dayat: Olo, imada tuakna.
NS: Anggo songoni ntong daganak i sude gari, jop roa mangaligina tile.
U Dayat: Imada.
NS: Anak ni si aha u bege na partangisan buse, ulang do um mincit umak nia tu lupak i na tangis ma langsung karejo nia.
U Dayat: Imada u bege tile.

42.        Int. Di pondok. Abis Maghrib.
Dayat: Ma idia ho Yahya, kehe ma ita muzakaroh ?
Yahya: Inda dohot au bornginon, pajolo ma Yat.
Dayat: Aso ?
Yahya: Malosok u lala
Dayat: O, pajolo ma au songoni tie.

43.        Direkam di parmuzakkarohan, marsiajar nahu. Guru mudzakkaroh manjelaskon parsijaran nahu.

44.        Int. Di Pondok. Ari Rabu. Potang-potang.
Dayat: Bang, balanjongku pokenon ma idia ?
Rahman: Nga adong ning supir motor i dipakirimkon etek Yat, surat on sajo mia, anggo danon dohot gule-guleon inda dong.

45.        Tarmenung si Dayat salaos mambaca surat i bagasan roa nia.

Assalamu ‘alaikum
Dayat, amang. Mudah-mudahan nian les markasehatan ko na manuntut ilmu di huta ni alakan.  Amang sabotulna, na borat do ilala umak na get pasampe surat on tu ho. Tai sondia mantong amang baenon, mungkin sonon ma dompak na pade tu ita. Songonon amang, pokenon inda bisa ikirim umak jo balanjo, harana inda adong epeng i tangan ni umak be. Ma iusahoon umak bage ma manginjam epeng tu jiranta anso les adong kirimon ni umak tu ho, taiinda adong dope rasokina,  inda pe tarbagi alai juo. Sobar ma ho jolo amang. Bope na marutang ma jolo ho mulak tu abang mu si Rahman. Pala dung dong epeng ni umak tongkin nai, baru igonti. Sobar ko tie amang. Mudah-mudahan nian dilehen tuhan di ho hasobaran anso les lalu sikola mi.

Wassalam

46.        Taraso lomah doma ilala si Dayat sude badan nia dung salose mambaca surat i. Manetek ilu ni mata nia.
Rahman: Aha dei isi ni surat i Yat ?
Dayat: On bang (ilehen surat i so ibaca si Rahman)
Ibaca si Rahman i bagasan roa nia.
Dayat: Sondia doma au abang ?
Rahman: Sobar ko anggi (laos iapus-apus si Rahman tanggurung si Dayat)

Marsambung….
Nantikan kelanjutannya dalam Film Sikola Purba 2…!!!



0 komentar:

Translate

Jumlah Pembaca

Instagram @kamal_btr