Si Bayo Batu

Si Bayo Batu

Cerpen Mandailing: Mustopa Kamal Batubara

Taridama opat daganak markaleren i alaman ni bagas na marcet na rata ombun i. Bope i  toru ni arilas, sai totop do sonang roha ni alai. Maso daganak mantong tie, maso atagianna i marmayam, maso na so tarlupahon, maso na paling sonang di hangoluan on. Inda unjung marsak songon marsak ni pangguris di atia udan.

“Batu, idia ayak ?” jou-jou sada bayo ngon julu ni daganak na atia markaleren i.

Daganak na opat on antong heran kalai mangaligi bayo naso binoto sanga ise na ijouon nia i. Perasaan ni alai nga dong na margoar si batu i antara ni alai na opat. Goar ni alai na opat si Hamid, si Lian, si Togop dot si Sein do. Bo aso ntong nga heran kalai mangaligi bayo na tibo-tibo mungkap ngon julu i.

“Ulang ligi homu, ompot na si gotap ulu do” ning si Lian tu dongan nia na tolu alak i.

“Si gotap ulu mei ntong arian. Bo ra mei” ning si Togop.

“Ra doba i” jawab ni si Lian mangalusi obar ni si Togop.

“Ho do rangku Hamid na imaksud ni udak i, harana ho do u ida na iligi ia. Alusima soni get tolap ma ia tu son bo” ning si Sein.

“Nga jau ba i, ompot naso au do ramu, maila au non” jawab si Hamid.

“Yakin au ho dei, sapai jadi” ipakuat si Sein hata nia na parjolo i.

“Olo ho mada. Ho do anak ni si Jaringgas kan, nampuna bagas on ?” ning bayo i tu si Hamid.

“Olo udak. Mua langa udak ?”

“Adong na porlu. Idia langa ayahta ?”

“O, na dompak i saba dope udak”

“Pasampe non tu ayak, bahasona na ijalaki udak da. Dokon, udak Jalandit nimu da”

“Olo udak”

Bayo ipe langsung ma kehe mulak tu arah julu. Di hakehean nia i, maninggalkon parsapaan na sangat godang i bagasan roha ni si Hamid. “Aso ipio udak i nangkin au si Batu. Iambang ia do na so dong jiba otak, isarupoon ia iba dohot batu na i batang aek an. Na jahat ma u ida bayo i” ning si Hamid i bagasan ate-ate nia.

***

Ipadonok si Hamid tu aya nia na atia juguk di pantar tonga i. Tarida do i boi ni aya nia na loja i karejo sasadari isabaan nangkin. Sabotulna inda na sampe hati ia mangganggu ayah nia na atia mambaca buku tuntunan sholat i. Tai bia baenon, tona ni alak wajib isampeon.

“Ayak, na mua do ayak i ?”

“Dompak mambaca buku tuntunan sholat amang. Mua langa ?”

“Songonon Yak, nangkin ro udak-udak manjalaki ayak. Pala nga sala au nangkin udak Jalandit goarna”

“O, mua buse langa ning udakmu ?”

“Adong ningia na porlu, ima so ijalaki ia ayak”

“O, udakmu ntong na porlu sajo dei ningia sude. Diarma bope naron doma iligi ayak ia tu lopo i”

“Salain i, adong dope ?”

“Inda be Yak, tai tarmilas nangkin roangku na ro i udak i”

“Bo, mua buse langa. Aha na masa na muba ?”

“Ipajat-jat udak i nangkin goarku, idokon ia au nangkin batu, nga u alusi ntong, iambang ntong naso iba na ipio nia i. Iambang ia do ntong sarupo iba dot batu na i batang aek an. Na maloma u ida udak i paila-ila alak, maila doma iba tu dongan-dongan niba i”

“Hehe… nga baen na ipajat-jat nia dabo ho amang i. baen jop ni roa nia dei tu ho. Ipio ia ho si Batu baen na Batubara i dei margamu”

“Maksudna Yak ?”

“Songonon, pala Batubara marga niba, pamioan niba si bayo Batu mei. Pala Nasution, pamioanna manjadi si bayo Suti. Pala Hasibuan, pamioanna manjadi bayo Buan. Pala Siregar, pamionna manjadi si bayo Regar”

“O, Pala Lubis Yak ?”

“Pala Lubis, pamioanna les si bayo Lubis”

“O, baen na songoni do yak i ?”

“Olo amang”

Taridama i boi ni si Hamid tanda na madung mangarti maksud ni si Jalandit i. Mikim-mikim ia mambege panjelasan ni aya nia i. Songon na marsala ilala ia tu si Jalandit baen na dung sala sangka i ia nagkin. I niatkon ia i bagasan ni roha nia nangkan mangido moof pala pasuo dot bayo na manjalaki aya nia i di amilasan ni ari nangkinan.

“Ido maksudna. Ooo” ning si Hamid.

“Oooo, ibuuul. Hehe…” ning bayo na manjelaskon maksud ni si Jalandit i.