MARBURAS (Naskah Drama Mandailing)

MARBURAS (NGERUMPI)

_Naskah Drama Komedi Mandailing_

Empat Orang Ibu-Ibu Sedang Marburas Di Teras Rumah

Umak Sangkot: Na sontingma sangajo arga ni gota i murana tie, nga sabanding ilala dot loja niba na manangkok i tu dolokan.

Umak Jalandit: Olo boto, mangan so mangan doma ilala na mangolu on pambaenna. Bo, na homu buse doma langa umak Sangkot sannari na manangkok tu dolokan. Inda aya ni si sangkot langa be ?

Umak Sangkot: Aya ni si Sangkot pe dohot juo, iba pe dohot. Tai anggo nga songoni na malosok do aya ni si sangkot tu dolokan.

Umak Jarindan: Bo, na hebat buse ntong tile.

Umak Japorngis: Imada, na hebat baya i.

Umak Sangkot: Sonima boto na tu iba. Nga tarilakkon be.

Umak Jalandit: Olo, na sontingan dabo alaklai sannari. Au pe gara-gara ni i ma so u sirangkon batas alaklaingki. Ana losok ntong karejo. Mangan jalan torus, marjudi jalan torus.

Umak Jarindan: Bo, umak Jalandit dope u ida na lobi sontingna tie, adaboru buse doma sannari langa manyirangkon ?

Umak Jalandit: Maksudna dabo, mangido jatuh tolak au tu pengadilan. Nangkin dabo majas dei.

Umak Jarindan: Olo ntong baya baen na maloi homu marmajas.

Umak Japorngis: Ajari homu iba dongan marmajas e, so malo buse iba.

Umak Jalandit: Aua mu dei, naron bermain majas buse ho tu alaklai mi. nga paham buse ia akhirna iambang na pajegeskon, rupa na pasusahkon.

Umak Jarindan: He sip komu, get lewat aya si Sangkot isi bo

Umak Sangkot: Padiar soni, nga na ibege ia jabat i

Ayah Sangkot: Bo na marburas buse doma langa karejo umakna

Umak Sangkot: Inda ba ayana, dompak manjalaki angin tu son bo, ana milas i bagas, angke ntong nga dong kipas angin isi

Ayah Sangkot: anggo na get marangin-angin rangku degesan dei batas tu sabaan, na gogoan i sadun angin, batas sakalian karejo, saba ipe ipas siap jadina

Umak Sangkot: Imada ayana, au pe u boto dei. Ari poken doon, nga dong kalak na kehe tu saba. Ngana ipangan babiat an ma iba non i sadun i

Ayah Sangkot: Homa Leh, au kehe ma jolo rangku tu lopo

Umak Sangkot: Jadima ayana, ulang ko naron lupa mangaligi jom pala atia kombur

Ayah Sangkot: Jadima

***

Umak Sangkot: Sonima boto namaralaklai on, manombo genanan bage doma ilala naso maralaklai

Umak Jalandit: Imada, tai bope songoni marpalan ko koum na mangkuling i, tongkin nai ipio tuhan alaklai mi, olos buse boto roamu

Umak Sangkot: Astaghfirulloh. Ulangba tehek tie, anggo on masona, ngape tahan juo au naso maralaklai

Umak Jalandit: Ma aya ni si Jarindan buse isi get lewat koum bo

Umak Jarindan: Ulang gogo-gogo dokon, ibege ia non

Ayah Jarindan: Aha buse do dongan karejo i on

Umak Jarindan: On bo adong sotik ison tona get dokonon bo

Ayah Jarindan: Sompat bage dope dabo juguk dot markombur na pasampe tona na sotik on nimu da

Umak Jarindan: Bo le ayana, nga tola langa dongan mangecek-ecek kiba i son tongkin

Aya Jarindan: Nga baen naso tola ba, tola mantong, tai dongan ulang sanga mangkobar-kobari alak jadina

Umak Jarindan: Olo dabo ayana, ami boto dei, ahado soni gunana iba na satiop ari i kehe mangaji tu bagas ni tuan an anggo les na giot mangkobar-kobari sajo dope karejo niba

Ayah Jarindan: Jadima, asalna ma dabo

***

Umak Jalandit: Na syuudzon buse ntong baya tile

Umak Jarindan: Olo, na syuudzonan i, iambang ia do na get mangkobar-kobari sajo karejo niba i

Umak Jalandit: He sip komu dongan, get mamolus aya ni si Japorngis bo

Umak Japorngis: Olo, marpalan kita sotik mangecek

Ayah Japorngis: Aha do karejo muyu isi umakna ?

Umak Japorngis: Nga dong ba abang

Ayah Japorngis: Nga dong dabo nimu tile, tai tarsongon na heboh do u bege homu na marburas i

Umak Japorngis: Biaso dei dabo abang, umak-umak mantong

Ayah Japorngis: Bo, ulang dongan sanga ipabiaso da, so ulang sego kaji na denggan

Umak Japorngis: Na goso ma u ida ilala abang na mangurus kecek ni adaboru i

Ayah japorngis: Inda baen gosona dabo anggi, baen sisena do

Umak Japorngis: Olo sarupona mei

Ayah japorngis: Kehe ma jolo songoni da dompak so gara api

***

Umak jalandit: Anggo na onan buse ntong na romantis nimu da, na abang-abang sajo doma u bege tile

Umak Japorngis: Olo, angkon na songonima giot ni alai

Umak Jalandit: Imada na mocom ma u ida hagiot ni alaklai sannari

Umak Sangkot: Inda hum alaklai sannari, umak-umak sannari pe mocom juo do u ida giotna. Nga soni do umak Jarindan

Umak Jarindan: Olo, na sarupo na do u ida sude, nangkon jabat marsitune-tunean. Rap marsipauba parangena be ma dongan

Umak Japorngis: Jadima koum, soni ma rangku jolo dongan na marburas i, ma tangis-tangis i sadun daganakku bo

Umak Jalandit: Bo baya, nga sodar jabat umak japorngis be, baen asikna ita na marburas i tie, Hehe…

SALOSE